Esta é unha proposta de xogo cooperativo na lista de correo de Bricolabs.

Trátase de deseñar un dispositivo tecnolóxico conxunto, non ten que ter ningunha función específica nin requerimento, só o que saia espontaneamente do grupo (se é que sae algo). Para isto, na lista de correo, un membro propón un elemento de partida e invoca a outro membro que debe engadir outro elemento conectado ao existente e, á súa vez, invocar a un novo membro e seguir así a cadea ata que a persoa encargada de decidir que remata así o declare.

• Só se pode engadir unha “función” de cada vez. Por exemplo, pódeselle engadir un microcontrolador cun programa que faga acender un led, pero non iso e que tamén publique o estado do led nunha web.
• Pódense engadir elementos eléctricos, mecánicos, electrónicos, de software ou hardware… sen máis limitación que que o novo engadido debera funcionar.
• Se o membro invocado non dá sinais de vida nun tempo prudencial, invócase a outro ou alguén pode auto-invocarse para tapar o oco.
• Estas regras serán interpretadas con grande amplitude de miras, subxectividade e incongruencia, sempre co obxectivo último e superior de se divertir xuntos.

Os deseños serán como a cada cal lle conveña, software de deseño electrónico, papel e lápiz, CAD… o que a persoa que o fai considere que é mellor para presentar a súa proposta e que o resto a entendan.

Proposta de procastino.